Sir 25
Wali agali ko bayalelame mana biaga ngago ogo
1I̱naga bu miniha irane tebiranaga turu ho ko. Irane tebira ogoni Anduane Homogonaga denibi wali agalinaga denibi bayale dege nga. Hamene kagola mini mbiraore ho holenebi nenege kagola mandagiore holenebi onene agalinila mandagi baya hangu birulenebi nga.2I̱naga bu miniha wali agali tebira uruni haga haga bu kagonaga manga ho ko. Mana tigua bialu kagome i̱ mo taga halu ka. Uruni mbirago yagibano bu karu tigua mini lene timbuni hetingi haga ka. Ani bialu homogo kagome ke̱ timbuni hagane ka. Wali agali waheore bu karume dabubinigo mana puguaga ka.
3Í̠ni daliahe keangi howa mbirale manda nabi hariyagua nde í̠ wahe howa agua manda buleberebe. 4Wahe halu dagua hariyagua miniha ko bayalela baya hangu mo tale bulene karulapeore nga. Waheore bedarume mana bayale ngago lawai hayagua bayale tigabiore bira. 5Waheale karume ti mini gigabi wu biralu agali haguane bu karume wali agali ti daluha haga karu lawai hayagua nde galoneore mbira ogoni nga. 6Manda bayale tara tara bidaru waheale karu tinaga yari nga. Ani bialu tigua Anduane Homogo gi halu ibu andaneha haga heagua ti mini lene timbuni holebira.
7I̱naga bu miniha mo turu hagane irane pira ngago ai uruni aria mbirago ibugua i̱ mo turu timbuniore hagane ngagola i̱na ogoni hongo howa latagi halu lolebero. Irane pira uruni ogo.
Mbira: Wali agalime tinaga waneigini mo turu haga.
Mende: Wali agalime tinaga waitigi karu mo ko halu homelo hame lagane.
8Tebone: Agalime wali ti one bedago manda bayale bi berelo hame lagane.
Mane: Wali agalime bi tigabi bayale ndo ngago latagi nahagane. ▼
▼(25.8)Mbuga alatawe gilibu wini ngagoha bi marubi hobane ogoniha gilibu winigo nga. Bi ogoni ogodagua leda. Nogome mabuha biabe bialu helonaga nogo bulumaga dongila mandagi hende hamagamaga bu henalaga, leda.
Dauni: Wali agali ti agali ko kagonaga biabe bia haga holene hame nalaga.
9Wali agali tinime mini tigabi ngago taya bialu mo yaga.
Waragane: Wali agali bu karume tinaga bi lawai harago hale hoa harago baba howa bi lole turu haga.
10Kane: Wali agalime mini giga bulene mo yu howa ti turu timbuni haga.
Halini: Anigo wali agali Anduane Homogo kago gi halu tini ibu andaneha haga.
Dini: Ani biaga kago ibugua wali agali maru karu bolangua hai hene ka.
11Pini: Heneneore Anduane Homogohondo gihalu ibuni andaneha haga kago ibu bolangua hai hene ka. Ani bialu wali agali mana ogoni latagi halu kago ibu duniniore mbira ka. ▼
▼(25.11-12)Mbuga alatawe gilibu ngagoha hobane ogoha bi marubi gilibu wiadege bida. Bi ogoni ogodagua leda. Wali agali Anduane Homogo gi haga kago ibugua Anduane Homogo gubalini holene hariga manda bida. Ani bialu wali agali Anduane Homogohondo mini mbiraore wu howa tigua ibu yu wahalu napolebira, leda.
Wali ko biaga bedurunaga mana ko biaga ngago ogo
13I̱ha genda tara tara ibiyagua i̱ mini burugu nale dege holeberogo ai i̱naga nenege bayaore mbira kagome i̱ wahalu piyagua nde genda timbuniore yu holebero. Wali agali maru karume i̱hondo mana ko dewa biyagua i̱ genda nahe dege holeberogo ainde i̱ one bedagome i̱hondo ko biyagua nde dara timbuniore ho holebero. 14Wali agali bu karume i̱ bayagua nde i̱ genda nahe dege holeberogo ainde waitigi ibalu i̱ mo ko hayagua i̱naga miniha dara timbuniore holebero. I̱na bialu harugonaga pani nolene ona ibiyagua nde i̱ genda nahe holeberogo ainde waitiginaga giha howa i̱ mo ko holene anda ibiyagua nde i̱naga miniha dara holebero. 15Puyanaga tomia ko ngago bolangua hene tomia hongohe mende nawiore. Walinaga keba holeneme keba holene bibahende ngaru bope hai haga nga.16Laiono gabua karu bababi puya ga̱u̱laga timbuni ngaru bababi mandagi birulene karulape degego ai wali ko bedago baba mandagi nabiruleorebero. 17Walime miniha tandaga timbuniore ho bereagua ibunaga dengui mo tara halu biango gabua ale. 18Ibu agalini kagome tomo ibuni nolene ibu damene andaga taya bu nalu ibunaga miniha genda wu kago yado naholebira.
19Genda damene bu ngaru bame degego ai wali tinime genda mo wia hayagua nde darabiore nga. Ani biyagua nde wali agali mana ko biaga bu karu pani nolene ngadagua nolebira.
20Agali waheore karume dindi ko iba dalu naibaga dindi be tauladagahe ngaruha hari kago irigi holene nakarulape nga. Anidagua dege agali mo palia holene karulo haga kagome ibu one keba timbuni halu lai hongo howa laabo haga bedago baba mandagi birulene ndelaheore nga.
21Wali dengui baya bedagome i̱ mo talola holigo de hondo holene nga. Ani bialu wali muni mbiraleru dewawi bedago hondowa ogoni dimagoli holigo hondo holene nga. 22Ai biabe bulene ngago wali ibu hangu bialu bedagola ibu agalini bameore ibaga bu heagua nde walime keba halu mine haragola agalini kago taga pani nolebira. 23Wali ko bedagome ibu agalini kagohondo mini tara tara mo wia halu genda mini burugu ngaru mo miaga beda. Wali ogoni ale biaga bedagome ibu agalini kago mo turu nahaga beda. Anidagua biragola ibu agalininaga hongo ereba hai halu gi himbi gedeore halu ge duli hilamagamaga bialu tingini durule hagane. 24Piganeore mana ko walime mo yu anda ibiyagome ina bibahendeore homai holene winigo nga. c 25Í̠naga iba beha bedago bame odo payubu ngelalu pu nabiaga. Anidagua dege wali ko kudaga bedagome bi nagalone ngago lo payapaya bialu helo wanahabe. 26Ibugua í̠naga bi larego hale nahayagua pelo talitagi halu pu labe. d
Copyright information for
HUI